ጥር 5 ቀን 2017 ዓ.ም (ሰላም ሚኒስቴር ) የኢትዮጵያ ኦርቶዶክስ ተዋህዶ ቤተክርስቲያን አሜሪካ በሚገኘው ዩተሃ ግዛት የቤተክርስቲያን መስሪያ ቦታ ተረክባለች።

ቦታውን አሜሪካ የሚገኘው የኋለኛው ቀን የኢየሱስ ክርስቶስ ቤተክርስቲያን (Church of Jesus Christ of Latter-day Saints (LDS),) ያበረከተ ሲሆን የስተርሊንግ ፋውንዴሽን የገንዘብ ድጋፍ አድርጓል ተብሏል።

የሰላም ሚኒስቴር የሰላም ግንባታ እና ብሔራዊ መግባባት ዘርፍ ሚኒስትር ዴዔታ ክቡር ከይረዲን ተዘራ (ዶ/ር) በርክክብ ስነ ስርዓት ወቅት እንደተናገሩት የሰላም ሚኒስቴር አመራሮች አሜሪካ በሚገኘው ዩተሃ ግዛት ለስራ በሄድንበት ወቅት በግዛቱ የሚገኙ የኦርቶዶክስ አምነት ተከታይ ምዕመናን የማምለኪያ ቦታ የሚሆን ቤተክርስቲያን ባለማግኘታቸው ሲቸገሩ ማስተዋለቸውን ገልፀው ችግሩን ለመፍታት የሰላም ሚኒስቴር ከኢትዮጵያ ሃይማኖት ተቋማት ጉባዔ ጋር በጋራ ባደረጉት ጥረት ቦታው እንዲገኝ ሆኗል ብለዋል።

መንግስት ከሃይማኖት ተቋማት ጋር በቅርርብ እየሰራ እንደሚገኝ ገልፀው በመላው ሀገሪቱ የሚገኙ ምዕመናን ሃይማኖታቸውን በነፃነት እንዲያራምዱ እና በሃይማኖቶች መካከል የአብሮነት እና የትብብር መንፈስ እንዲያድግ የተለያዩ እንቅስቃሴዎችን እያደረገ ይገኛል ብለዋል።

የኢየሱስ ክርስቶስ ቤተክርስቲያን (Church of Jesus Christ of Latter-day Saints (LDS),) የቤተክርስቲያን መስሪያ ቦታውን ለኢትዮጵያ ኦርቶዶክስ ተዋሕዶ ቤተክርስቲያን ማስረከቡ በሐይማኖቶች መካከል ያለውን የመደጋገፍ ፣የአብሮነት እና የትብብር መንፈስ ያሳያል ያሉ ሲሆን ይህ ደግሞ የኢትዮጵያውያን ዕሴት ሆኖ ለዘመናት ቆይቷል ብለዋል።

መንግስት ዜጋ ተኮር የሆነ ስራ እየሰራ እንደሚገኝ የገለፁት ሚኒስትር ዴዔታው ከዚህ የወሰድነው ትምህርት አንዱ ሃይማኖት አንዱን መደገፍ ከቻለ እና በመሠረታዊ ሀገራዊ ጉዳዮች ላይ መተባበር ከቻሉ ሀገር ሰላሟ እንደሚፀና ነው ብለዋል።

የኢትዮጵያ ኦርቶዶክስ ተዋህዶ ቤተ ክርስቲያን ፓትርያርክ ብፁእ ወቅዱስ አቡነ ማትያስ በበኩላቸው የኢትዮጵያ ኦርቶዶክስ ተዋህዶ ቤተ ክርስቲያን አሜሪካ በሚገኘው ዩተሃ ግዛት የቤተክርስቲያን መስሪያ ቦታ በማግኘቷ ታላቅ ደስታ ይሰማናል ፣በሂደቱ ድጋፍ እና ትብብር ለአደረጉ ሁሉ ምስጋናዬ ላቅ ያለነው ብለዋል።