ታህሳስ 18 ቀን 2017 ዓ.ም (የሰላም ሚኒስቴር) ብሔራዊ በጎ ፈቃድ የማኅበረሰብ አገልግሎት ኢትዮጵያዊ እሴቶችን በማዳበር ብሔራዊ መግባባትና ሀገራዊ አንድነትን እንደሚያጎለብት ጥናቶች አረጋገጡ፡፡

ባለፉት ሦስት ተከታታይ ዓመታት በመደበኛና የክረምቱ ልዩ የበጎ ፈቃድ የማኅበረሰብ አገልግሎቶች የተከናወኑ ተግባራት ማህበረ-ባህላዊ እሴቶችን በማጎልበትና በማሻሻል ሀገራዊ አንድነትን፣ ብሔራዊ መግባባትን እና ማህበረሰባዊ ትስስር እያጠናከረ መሆኑን የሰላም ሚኒስቴር ከከፍተኛ የትምህርት ተቋማት ጋር በመተባበር የተደረገው ጥናት አመላክቷል፡፡

በሰላም ሚኒስቴር የሰላም ግንባታና ብሔራዊ መግባባት ዘርፍ ሚኒስትር ዴኤታ ክቡር ከይረዲን ተዘራ (ዶ/ር) ሀገራዊ ፕሮግራሙ ወጣቱን በማቀራረብ ዕርስ በርስ የሚያስተዋውቅ፤ በዜጎች መካከል የተፈጠረውን ጥርጣሬ በማጥፋት ከልዩነት ይልቅ አንድነትን እና ወሰን ተሻጋሪ አስተሳሰቦችን የሚያጎለብት፤ በሀገር ግንባታ ላይ የሚታዩ ስብራቶችን በመጠገን ብሔራዊ መግባባት እንዲፈጠር በትልቁ እያበረከተ መሆኑን ገልጸዋል፡፡

የመደበኛው መርሐ ግብር ተሳታፊ በጎ ፈቃደኞች እና በክረምቱ ልዩ በጎ ፈቃድ የማኅበረሰብ አገልግሎት የሚሳተፉ የከፍተኛ ትምህርት ተቋማት ተማሪዎች በአካባቢ የታጠረ እሳቤን ሰብረው ከተወለዱበትና ካደጉበት አካባቢ ወደ ሌሎች የሀገሪቱ አካባቢዎች ሄደው የበጎ ፈቃድ አገልግሎቶችን በመስጠት የኢትዮጵያዊ ብዝኃነት ፀጋዎቻችን የሆኑ ባህሎችን፣ ቋንቋዎችን፣ ማኅበራዊ እሴቶችን እና ወጎችን በመገንዘብ ርስ በራሳቸው የሚተዋወቁበትና የአብሮነት መስተጋብሮችን የሚያጠናክሩበት መሆኑን ክቡር ሚኒስትር ዴኤታው አስገንዝበዋል።

የሰላም ሚኒስቴር ከባህር ዳር ዩኒቨርሲቲ ጋር በመተባበር ሀገራዊ ፕሮግራሙን ተግባራዊ ማድረግ ከጀመረበት ጊዜ ጀምሮ ያለውን አፈጻፀም የሚያሳይ ጥናት ተሠርቶ የቀረበ ሲሆን በጥናቱ የተረጋገጠ ገንቢ ግኝት መሠረት ያደረገ አፈጻፀም ተጠናክሮ እንደሚቀጥል ተገልጿል፡፡