ታህሳስ 26 ቀን 2016 ዓ.ም (ሰላም ሚኒስቴር)፣ የሰላም ሚኒስቴር በተቋማዊ ስነ-ምግባር እና መልካም አስተዳደር ፣ ተቋሙ እያከናወናቸው ባሉ ተግባራት እና በቀጣይ የትኩረት አቅጣጫዎች ላይ ለሰራተኞች የአቅም ግንባታ ስልጠና ሰጥቷል፡፡

በስልጠና መድረኩ ላይ ተገኝተው መልዕክት ያስተላለፉት የሰላም ሚኒስቴር የሚኒስትር ጽ/ቤት ኃላፊ ተወካይ አቶ አዱኛ በቀለ ስልጠናው የተቋሙን ተግባርና ተልዕኮ በደንብ ተረድቶ እና ለተግባራዊነቱ የራሱን አሻራ የሚያሳርፍ አመራርና ሰራተኛ ለመገንባት ያለመ መሆኑን ተናግረዋል ።

የምንሰራቸው ስራዎች ሁሉ በዕውቀት እና በስነ ምግባር ሊደገፉ ይገባል ያሉት አቶ አዱኛ ተቋሙ እያከናወናቸው ባሉ ተግባራት ላይ ሁሉም ሰራተኛ ሚና አለው ያሉ ሲሆን ተቋም የሚያድገው በአንድነት መንፈስ መስራት ስንችል መሆኑን ገልፀዋል፡፡

በስልጠና መድረኩ ላይ የሰላም ሚኒስቴር የሰው ሀብት ባለሙያ የሆኑት አቶ እሱባለው አልማው ‘’ሥነ -ምግባር እና ሙያዊ ሥነ- ምግባር” በሚል ርዕስ ስልጠና የሰጡ ሲሆን ከስልጠናው በኋላም ጥያቄዎች እና ሃሳቦች ተነስተው ውይይት ተደርጓል፡፡

በስልጠናው ማጠቃለያ ላይ ተገኝተው መልዕክት ያስተላለፉት የሰላም ሚኒስቴር የሥራ አመራር ዋና ሥራ አስፈፃሚ አቶ መብራቱ ካሣ በስልጠናው ያገኘናቸውን ዕውቀቶችና ክህሎቶች ወደ ተግባር በመቀየር ለተቋሙ ውጤታማነት መስራት ይገባናል ብለዋል፡፡ አክለውም የተቋሙ አመራሮችና ሰራተኞች ጊዜው የሚጠይቀውን የቴክኖሎጅ እና አለማቀፋዊ ሁኔታውን በመረዳት በስነ ምግባርና በታማኝነት ለአዳዲስ አሰራሮች ራስን ዝግጁ ማድረግ ይጠበቅበታል ብለዋል።

ሰራተኛው ያለበትን ችግር ለመፍታት እና የተሻለ የስራ አካባቢ ለመፍጠር የተለያዩ እንቅስቃሴዎችን እያደረግን እንገኛለን ያሉት ደግሞ የሰላም ሚኒስቴር የብቃትና ሰው ሀብት ሥራ አስፈፃሚ አቶ ብዙነህ ምክሩ ናቸው። አቶ ብዙነህ ሰራተኛው ህዝብን ለማገልገል ውል የገባ መሆኑን አውቆ በስነ-ምግባር እና በታማኝነት የተቋማችን ተልዕኮ ልናሳካ ይገባል ብለዋል።